ПОЛАРИС ИХ ДЭЛГҮҮРИЙН ХАМТ ОЛОНД ДЭЛГҮҮРИЙН МЕНЕЖМЕНТ СУРГАЛТЫГ ЗОХИОН БАЙГУУЛЛАА

Монгол-Японы төвөөс 2024 оны 10 сарын 30,31-ний өдөр БӨТА ХХК-Поларис их дэлгүүрийн хамт олонд “Дэлгүүрийн менежмент” сургалтыг зохион байгууллаа. Сургалтад тус компанийн албаны дарга, брэнд менежер, дэлгүүрийн эрхлэгч, худалдааны зөвлөхүүд оролцлоо. Сургалтыг Монгол-Японы төвийн үндэсний сургагч багш, “Засагт хан партнерс” компанийн захирал Ж.Гансүх удирдан явуулсан юм. Сургалтыг жижиглэн худалдааны менежментийн ахисан түвшний мэдлэгийг олгох зорилготойгоор, дэлгүүрийн төрөл, ангилал, дэлгүүр нээх бодлого, байршлын стратеги, барааны удирдлага, дата дүн шинжилгээ, үйлчилгээ гэсэн сэдвийн дагуу зохион байгууллаа.

Гансүх багш дэлгүүрийн менежментийн олон улсын стандартын дагуу, “Наран март” ХХК, “Central Express CVS” ХХК (CU)-д ажиллаж байсан туршлага дээрээ суурилан онол болон практикт суурилан сургалтаа заасан юм. Дэлгүүрийн бизнес эрхлэгч, худалдааны зөвлөхүүдийн хувьд зөвхөн бараа бүтээгдэхүүнээ борлуулаад, үйлчилгээ үзүүлэхдээ төвлөрөх бус дэлгүүрийн концепцоо ойлгож, ямар ч дэлгүүр байсан цаад менежмент, онолыг мэдэж, зорилтот хэрэглэгчээ таньж ойлгох юм бол илүү амжилттай бизнесээ эрхэлж, олон хэрэглэгчийг татан үнэ цэнтэй үйлчилгээ үзүүлнэ гэдгийг онцоллоо.

Поларис их дэлгүүр нь 2017 онд байгуулагдсан, Японы Noritake, Nishikawa, Toli, Gunze, Kabaya брэндүүдийн албан ёсны дистрибьютр бөгөөд чанартай, урт насжилттай, хэрэглэгчдэд тав тух болон үнэ цэнийг өгөх бүтээгдэхүүнийг худалдаалдаг онцлогтой дэлгүүр юм. Худалдааны зөвлөхүүд нь бараа бүтээгдэхүүнийхээ талаар маш сайн мэдлэгтэй, харилцааны соёлтой, мэргэжлийн бөгөөд дэлгүүр нь Японд үйлчлүүлж байгаа мэт мэдрэмжийг авч болох ая тухтай, тайван орчныг бүрдүүлж чадсан билээ.

Поларис их дэлгүүрийн хамт олондоо сургалтаар суралцсан зүйлсээ ажилдаа хэрэгжүүлж, үйлчилгээгээ улам чанаржуулж, үнэ цэнээ улам өнгөлөхийг хүсье.

Дэлгүүрийн менежмент сургалтыг байгууллага, хамт олноороо авахыг хүсвэл Монгол-Японы төвийн Бизнесийн сургалтын тасгийн 8063-0879 утсаар холбогдоорой.