Монгол Японы төвөөс 2026 оны 3 дугаар сарын 10–11-ний өдрүүдэд “СОР КАШЕМИР” ХХК-д ажлын байран дээрх 5S Кайзэн сургалтыг амжилттай зохион байгууллаа.
Тус сургалтыг Монгол Японы төвийн үндэсний сургагч багш, “Моншибасаки” ХХК-ийн захирал Д.Долгормаа удирдан явуулсан бөгөөд компанийн удирдах ажилтнууд болон нийт ажилчдад 5S Кайзэний нэгдсэн ойлголтыг бий болгох зорилготой байв.
Сургалт хоёр удаагийн хичээлээр нийт 6 цагийн суурь мэдлэг олгох хэлбэрээр зохион байгуулагдаж, 80 гаруй ажилтан идэвхтэй хамрагдлаа.
Сургалтын хүрээнд ажлын байрны эмх цэгц, эрэмбэ, цэвэрлэгээ, стандартчилал, хэвшүүлэх зэрэг 5S Кайзэний үндсэн ойлголтуудыг танилцуулахын зэрэгцээ байгууллагын үйл ажиллагааг тасралтгүй сайжруулахад чухал үүрэгтэй Кайзэн (тасралтгүй сайжруулалт), PDCA цикл, мөн ажлын харилцааг илүү үр дүнтэй болгох Хо-Рэн-Со (мэдээлэх, холбоо барих, зөвлөлдөх) арга барилын талаар мэдлэг олгов.
“СОР КАШЕМИР” ХХК-ийн ажилчид багаар нэгдэн идэвхтэй оролцож, байгууллагын халуун дулаан уур амьсгал сургалтын үр дүнг улам нэмэгдүүлж байлаа. Мөн Д.Долгормаа багшийн ойлгомжтой, бодит жишээнд тулгуурласан заах арга барил нь оролцогчдод сургалтын агуулгыг илүү сайн ойлгож, ажил дээрээ хэрэгжүүлэх урам зоригийг төрүүлсэн юм.
Энэхүү сургалтын үр дүнд компанийн ажилтнууд 5S Кайзэний талаар нэгдсэн ойлголттой болж, нэг зорилгын төлөө хамтран ажиллах суурь тавигдлаа гэж онцолж байна. Та бүхэнд ажлын амжилт хүсье!
